సరైన దారి.. ఈ సర్దారి. మన్మోహన్ జీ కి అక్షర నివాళి

ఒక శకం ముగిసింది  

నీతి చిన్నబోయింది..

తన ప్రతిరూపం 

అంతరించిపోయిందని..

నిజాయితీ అనుకుంది..

రాజకీయాల్లో ఇలాంటి

మనిషిని మళ్ళీ 

చూడగలుగుతానా అని..

విస్తుపోయింది అవని..

భారత దేశ ధృవతార

ఇలా అకస్మాత్తుగా

మరలిపోయిందేమని

 మన్మోహన్ సింగ్ ఇక లేరు

రాత్రి పడుకోబోయే ముందు

పిడుగు లాంటి వార్త..

నిండైన ఆ రూపం..

మొహంలో అణువణువునా

కనిపించే విజ్ఞానం..

చురుకైన కళ్ళు..

నడకలో హుందాతనం..

నడతలో నిజాయితీ..

ఒక్కసారి కళ్ల ముందు

1991..96 మధ్య రీళ్ళు

గిర్రున తిరిగాయి..

భారత ఆర్థిక వ్యవస్థ

ఎలా గాడిలో పడి 

కొత్త పరుగులు నేర్చిందో

ఆ దృశ్యాలు చకచకా

బుర్రలో మెదిలాయి

 ఒక్క మనిషి.

ఆ మనిషిని రాజకీయాల్లోకి

తెచ్చిన పెద్దమనిషి

ఆ ద్వయం సాధించిన అద్భుతం..

పరిస్థితే మారిపోయింది

ఆసాంతం

సర్దార్జీ

ప్రతి భారతీయుడు

మిమ్మల్ని కొలుస్తూనే

ఉంటాడు జీవిత పర్యంతం

గొప్ప కీర్తి సదా మీ సొంతం

 మన్మోహన్ సింగ్

జీవితంలో ఎంత కూడబెట్టాడో

తెలియదు కాని..

ఆయన జీవితం మొత్తం లెక్కలే..

లెక్కలంటే

రెండ్రెళ్లు నాలుగు..

రెండు మూళ్ళు ఆరు..

లెక్కలు కాదు..

అక్కడితో సరిపోట్టుకుంటే

ఆయన మన్మోహన్ సింగ్

ఎందుకవుతారు..

ఈ సింగ్

ఆర్థిక మంత్రిత్వంలో 

దేశం అంతగా 

ఎందుకు

స్వింగ్ అవుతుంది